ရခိုင်ဒေသခံအချို့က MSF သည် ဒေသတွင်း ခွဲခြားကူညီသည်ဟု စွပ်စွဲကာ ရခိုင်ပြည်နယ်မှ ထွက်ခွာပေးရန် ၂၀၁၄ ခုနှစ် ဖေဖော်ဝါရီလ ၂၂ ရက်က ကန့်ကွက်ဆန္ဒပြနေသည်ကို တွေ့ရစဉ်။ ဓာတ်ပုံ - AFP
နိုင်ငံတကာ မျက်နှာစာတွင် ဝေဖန်ခံနေရခြင်းကို ပြန်လည်ဖြေရှင်းရန်
ရခိုင်ပြည်သူလူထုက လက်မခံသော အကူအညီပေးရေးအဖွဲ့ဖြစ်သည့် MSF ကို
လက်ခံရခြင်းဖြစ်သည်ဟု ရခိုင်ပြည်နယ် အစိုးရအဖွဲ့က ထုတ်ပြန်လိုက်သည်။“လက်ရှိနိုင်ငံတကာမျက်နှာစာတွင် လွန်ကဲစွာ ဝေဖန်သုံးသပ်ခံနေရခြင်းများနှင့် အတူဆိုးရွားသော မကောင်းသော ပုံရိပ်များ ဖော်ဆောင်နေမှုတို့ကို ထင်သာမြင်သာရှိအောင် မဖြစ်မနေ အရေးကြီးအချိန်အခါဖြစ်ပါသဖြင့် ယခုကဲ့သို့ ဖိတ်ခေါ်ရခြင်း ဖြစ်သည်”ဟု ပြည်နယ်အစိုးရအဖွဲ့ဝန်ကြီး ချုပ်က ထုတ်ပြန်ထားသည်။
ပြည်နယ်ဝန်ကြီးချုပ်၏ ထုတ်ပြန်ချက်တွင် ရခိုင်ပြည်နယ် ဖွံ့ဖြိုးရေးအတွက် ရေးဆွဲထားသော ဖွံ့ဖြိုးရေးစီမံကိန်းတွင် နိုင်ငံတကာ အဖွဲ့အစည်းများ ပူးပေါင်းပါဝင်ရန် လိုအပ်နေသည်ဟုလည်း ထုတ်ပြန်ချက်တွင် ပါဝင်သည်။
MSF ပြန်လည်ဝင်ရောက်ရေးကို ကန့်ကွက်ခဲ့သော စစ်တွေ မြို့မိမြို့ဖအဖွဲ့ဝင် ဦးသန်းထွန်းက “ကျွန်တော်တို့က ကန့်ကွက်ထားတယ်၊ ဒါကို ပြည်နယ်အစိုးရက ဆက်လုပ်တယ်ဆိုရင် နောက်ဖြစ်လာမယ့် ပြဿနာအားလုံးဟာ အစိုးရမှာပဲ တာဝန်ရှိတယ်”ဟု မဇ္ဈိမကို ပြောသည်။
ရခိုင်ပြည်နယ်ဝန်ကြီးချုပ်၏ ထုတ်ပြန်ချက်တွင် UN, INGO များ၏ ရခိုင်ပြည်နယ်အတွင်း ဆောင်ရွက်မှုများနှင့် ပတ်သက်၍ ပြည်နယ်အစိုးရအဖွဲ့က တာဝန်ယူသည်ဟုလည်း ထုတ်ပြန်ထားသည်။ ပြည်ထောင်စုအစိုးရနှင့် ရခိုင်ပြည်နယ်အစိုးရတို့က MSF အပါအ၀င် နိုင်ငံတကာ အကူအညီပေးရေးအဖွဲ့များ ပူးပေါင်း ပါဝင်ကြရန် ဇူလိုင်လ ၂၄ ထုတ် နိုင်ငံပိုင် သတင်းစာများတွင် ထုတ်ပြန်ထားသည်။
ရခိုင်ဒေသခံတို့၏ ကန့်ကွက်မှုကြောင့် အကူအညီပေးရေးလုပ်ငန်းများ ရပ်နားထားရသော MSF အဖွဲ့ကမူ အစိုးရ၏ ကမ်းလှမ်းမှုကို သတိကြီးစွာကြိုဆိုသည်ဟု ထုတ်ပြန်ထားသည်။
